Gascon : Plan venguts a Brassempoi

Lo vilatjòt de Brassempoi que's tròba en Shalòssa, au sud deu departament de las Lanas. Aporicat suus costalats qui bordejan la vath deu Lui de França, qu'es un vilatge ric deus testimònis de la soa istòria.

Contact

PréhistoSite de Brassempouy
404 rue du musée
40330 BRASSEMPOUY

contact@prehistoire-brassempouy.fr
+(33)5.58.89.21.73

Brassempoi qu'es sustot coneishut pr'amor de las descobèrtas hèitas dens las tutas deu Papa. Aqueth site deu Paleolitic superior qu'a balhat ua renomada mondiau au vilatge, mercès a la descobèrta de la Dauna deu capulet, dita tanbenh " Dauna de Brassempoi ", famosa estatueta en evòri de mamot, escultada 30 000 ans i a. Uei, que descobréishem la soa istòria hens un espaci museografic : l'Ostau de la Dauna.

L'Ostau de la Dauna es consacrat au site arqueologic de Brassempoi. Per dehens, mants objècts tirats de las caunas deu Papa que son muishats : sobras d'animaus, utís en pèirahuec, atifalhs, gravaduras sus òs… Lo punt hòrt d'aqueth musèu qu'es ua suberbèra colleccion de reproduccions de figurinas femininas deu Paleolitic, qui ns'es estada auhèrta per Enric DELPORTE, ancian conservator deu Musèu de las Antiquitats Nacionaus de Saint-Germain-en-Laye (78), e eminent preïstorian. Preu miei de totas aqueras Vènus, qu'i es presentat, segur, lo mei ancian portrèit coneishut d'un èste uman : la Dauna de Brassempoi (l'originau que n'es conservat au M.A.N.).

La visita que's contuna capvath l'ArqueoParc de la Dauna qui'vs convida a ua vertadèra immersion dens l'univèrs de la preïstòria. La passejada que permet d'abordar la vita vitanta deus òmis de Cròsmanhon, mercés a la reconstitucion deu cobèrt vegetau e deu herumi d'aquera tempora glaciària qui vedó vàder la Dauna de Brassempoi. Devath l'espiada deus mamots, cadun que's pòt assajar a la caça preïstotica e descobrir los gèstes deus nostes davancèrs au travèrs de demostracions de talha de pèirahuec e d'alucatge deu huec. Ua manèita de visita numerica, causidera en francés / anglés / espanhòu / alemand, que balha lo parat de complir de faiçon divertissenta aquera aventura sus la tralha de Cròsmanhon.

D'autas epòcas qu'an deishat traç en aqueth plasent vilatge, sustot l'Edat-mejana.
E efèit l'edificacion deu borg qu'es d'aquera tempora. Lo borg qu'es atau organisat en vilatge-carrèra : las maisons que son alinhadas delong ua carrèra principau barrada d'un costat per lo castèth (lo qui es uei vededer qu'es deu sègle XIX), e de l'aut bòrd, per la glèisa. Aquera glèisa qu'es ua joja de Brassempoi : edificada a l'epòca romana, mes hòrt arremanejada aus sègles XVau e XVIau, qu'es uei classada Monument Istoric. Las òbras naveras de restauracion que la tornàn tota la soa esplandor deus sègles passats.

La Dauna deu Capulet, nouvel emblème de la Gascogne (par Région Gascogne Prospective)